من شي سنتين ونص اتعرفت ع شب اصغر مني بشوي، ملاك وماشي عالارض ادب ودين وطيبة وكرم وفوق

٤٢ سنة والله ما كتبلي نصيب بعد تا اتزوج، نحمد الله عكل شي.
من شي سنتين ونص اتعرفت ع شب اصغر مني بشوي، ملاك وماشي عالارض ادب ودين وطيبة وكرم وفوق من هاد متفهم ومعشره حلو، مش شايف صبية غيري بالدني ومدللني وبيخاف الله فيني، بحسه ابي الله يرحمه واخي وحبيبي وكل أهلي. بحس الله بعتلي هوه بعد حياة صعبي كتير تا يعوضني عن كل شي شفته بحياتي. ما زعلني ولا مرة من يوم ما عرفته بالعكس يوم عن يوم بحترمه وبتعلق فيه اكتر.
الشب عنده دبلوم بس ما حسن يطور من وضعه منشان هيك قرر يكمل دراسته وكان سنة تانية بكالوريوس لما تعرفت عليه، منشان هيك حالته المادية كانت وبعدا صعبة من شغل لشغل وراتب منّوو كتير ما بيحسن يفتح بيت. بقيانله فصل وبيتخرج وعمّا يدور ع شغل هلأ بس لسه ما توفق، من قبل سنة وعدني ييجي يطلبني اول ما يلقى شغل مناسب ويحوّش مصاري يقدر يفتح فيهن بيت، والله ما كان عندي مشكلة انطره العمر كله كنت خلص يعني ما عاد عندي امل من موضوع اني جيب ولاد، مع انه ربي بيشهد ما بيروح الموضوع من بالي ابدا وكتير مخنوقة ورهبانة من فكرة انه عن قريب يمكن ما عاد فيني جيب ولاد منشان عمري (او يمكن من هلأ خلص ما عاد فيني جيب ولاد من بعد الاربعين بجد ما بعرف)
وهلأ فيه عريس اكبر مني ب١٤ سنة مطلق وولاده كبار وشكله كتير كبير متل أبي ومنّي حاسه فيه شي مشترك بيناتنا ومنّي متقبلته بس لقيت حالي واقعة بين نارين، بستناه للي بحبه مع انه يمكن محتاج وقت ليكوّن حاله ويجهز للجيزة ومن هون لوقتى يمكن ميعود فيني جيب ولاد؟ ولا بتجوز يلي جاهز للجيزة وبسرعة مع اني منّي متقبلته ابدا بس منشان لحق اخر فرصة جيب ولد اذا هو قبل انه نحاول؟
تعبت من كتر ما فكرت واستخرت ومنّي عارفه قرر قرار ما اندم عليه بالمستقبل. من ناحية بحبه للشب ومنّي متقبلة فكرة اني عيش بلاه وحاسه هوي الوحيد يلي فيّه يسعدني ومن ناحية خايفة اندم اني ابقى باقي عمري بلا اطفال.
احترت كتير وبعدني مبعرف اذا فيني جيب طفل اساسا بهيك عمر او لا، مبعرف اذا انه سهل او صعب او حتى ممكن البنت تجيب طفل بعد عمر ال٤٢، سالت كتير وقريت عالانترنيت كتير بس ما حسنت لاقي جواب.
عادي البنت تجيب طفل بعد ال٤٢؟ ولو انتوا مكاني شو بتعملوا؟ ادعولي اختار الصح  قلبي او عقلي

One thought on “من شي سنتين ونص اتعرفت ع شب اصغر مني بشوي، ملاك وماشي عالارض ادب ودين وطيبة وكرم وفوق

  1. فارس النور says:

    حبيبتي ما في اجبار بالعلاقات العلاقه الي قلبك ما مرتاحلها ما تكملي فيها ما تضيعي عمرك مشان فكرة انو ما راح جيب ولاد وبالنسبه لحبيب القلب انو خلص بكفي يجي البيت من بابو ويجيب الذبل معو وبيت يستركم وحال الحياة بتغير بلشو ببساطه وبتتطورو ما تبحثو عن الكمال بالبدايات بسطو الموضوع وانت اذا بتقدري تساعديه وبستاهل ساعديه بس ما تكوني ساذجه ويستغل طيبتك والله يختارك الافضل وتذكري لحظة انتهاء العمر هل القرار الي اخذتيه مرتاحه منو وكويس ولا لا

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *